Во текот на изминатото деноноќие полициските службеници затекнале 180 возачи кои возеле под дејство на алкохол, а напишале и 330 казни за непочитување на дозволената брзина. Од сите казни дури 188 ги направиле скопјани.
„Во текот на вчерашната вечер (19/20.03.2022) во периодот од 22:00 до 3:00 часот спроведена е зајакната акциска контрола за санкционирање на возачи кои управуваат возила под дејство на алкохол на територијата на Републиката, при што санкционирани се 180 возачи. Од нив 43 на територија на СВР Скопје, 27 на територија на СВР Куманово, 21 на територија на СВР Струмица...“, соопшти МВР.
Министерството за внатрешни работи спроведе засилена акциска контрола и за санкционирање на возила кои се движат со брзина поголема од дозволената, при што санкционирани се 330 возачи. Од нив 34 возила се движеле со брзина над 50 километри на час повеќе од дозволеното, а две возила се движеле со дури над 70 километри на час повеќе од дозволената брзина. Притоа, 139 возачи ја пречекориле брзината во населено место, а 191 надвор од населено место.
На територија на град Скопје изречени се вкупно 188 мерки, меѓу кои за возење повеќе од дозволената брзина 60 санкции, 34 мерки за возење под дејство на алкохол, 13 санкции за возење без возачка дозвола. Изречени се 5 мерки за користење мобилен телефон, 7 санкции за минување на затворен сигнал (црвено светло) и 40 за непрописно паркирање.
„Засилените акциски контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта“, апелира МВР до несовесните возачи.