Информациите на медиумите за киднапиран украински авион во главниот град на Авганистан се невистинити, изјави денеска портпаролот на украинското Министерство за надворешни работи, Олег Николенко за украинската агенција РБЦ.
„Ниту еден украински авион не е киднапиран во Кабул или на кое било друго место. Наводите за киднапиран авион кои ги пренесоа некои медиуми се невистинити“, нагласи Николенко.
Според него, сите авиони со кои Киев ги евакуирал украинските државјани од Авганистан безбедно се вратиле во Украина, а досега се евакуирани 256 лица на три летови.
Портпаролот на Иранската организација за цивилно воздухопловство, Мохамад Хасан Зибакш, исто така ги негираше информациите за киднапиран авион.
Тој посочи дека еден украински авион слетал во иранскиот град Машад, но за да наполни гориво, а потоа продолжил кон Киев, каде што пристигнал во 22:50 часот по локално време.
Претходно денеска, украинскиот заменик министер за надворешни работи, Јевгениј Јенин, изјави дека неидентификувани лица киднапирале украински авион и го пренасочиле кон Иран.
