Севернокорејскиот лидер Ким Џонг Ун одржа говор на воената парада во Пјонгјанг со „кнедла во грло“ и им се извини на своите сограѓани што не успеал да им ги подобри животите.
Reuters известува дека на прославата за 75-годишнината од основањето на Работничката партија која има целосна моќ во Северна Кореја, тој најпрво им се заблагодари на илјадници војници за сите нивни жртви, вклучително и за помошта во спречување на ширењето на новиот коронавирус во оваа земја.
Лидерот рече дека е благодарен што „ниту еден Севернокореец не е заразен со вирусот“. САД и Јужна Кореја отворено се сомневаат дека Северна Кореја е поштедена од COVID-19.
Сепак, Ким Џонг Ун исто така рече дека влијанието на мерките против пандемијата, меѓународните санкции и влијанието на неколку тајфуни заедно ја спречиле неговата влада да ги подобри животите на своите граѓани.
„Моите напори и искреност не беа доволни да го спасат нашиот народ од животните проблеми“, рече врховниот водач.
На снимката од неговиот говор се гледа како пред расплаканите и потресени војници, како и пред другите граѓани, тој зборува вцрвен во лицето, како со „кнедла во грло“ и во еден момент правеше движење како да си ги брише солзите.
За време на викендот, аналитичарите на Западот забележаа дека воената парада се одржа во крајно невообичаени услови, за прв пат в зори, а сега многумина од нив толкуваат дека овој потег на Ким е показател дека големиот лидер е под голем притисок од неговите политички противници и проблемите во земјата.
ООН претходно соопшти дека 40 проценти од Корејците на Северот немаат доволно храна. Во меѓувреме, според извештаите на различните агенции, ваквата ситуација дополнително ја влошија силните поплави поради тајфунот и дополнителното зајакнување на веќе затворените граници со цел да се задржи пандемијата надвор од границите на Северна Кореја.