Кинескиот амбасадор во Обединетите нации на вонредната итна седница на Генералното собрание на ОН посветена на руската инвазија на Украина изјави дека светот „нема да добие ништо“ од нова Студена војна.
„Студената војна одамна заврши. Начинот на размислување од Студената војна за конфликт мора да се напушти“, рече Џанг Јун од говорницата на Генералното собрание, истакнувајќи дека „сите ќе бидат во загуба“ со враќањето на таквата политика.
Русија е на обвинителна клупа на Генералното собрание на ОН, на „вонредна итна седница“ на нејзините 193 членки кои треба да одлучуваат за руската инвазија на Украина за која одлучи Владимир Путин.
Кина, која не сака да ја осуди Русија за нападот, повика на смирување преку портпаролот на Министерството за надворешни работи Ванг Венбин, кој ги повика завојуваните страни „да останат мирни и воздржани за да се спречи нова ескалација“.
Од избувнувањето на конфликтот, кинеската дипломатија вешто одржува рамнотежа помеѓу политичката блискост со Москва и нејзината традиционална одбрана на „суверенитетот и територијалниот интегритет“ на државите.
Пекинг во петокот не сакаше да гласа за резолуцијата на Советот за безбедност на ОН со која се осудува руската агресија, но не се спротивстави, туку се воздржа.
Комунистичкиот режим не сака да зборува за руска „инвазија“ и вели дека ги „разбира“ безбедносните барања на Русија, кои ги смета за „разумни“, согласувајќи се со жалбите на Москва до НАТО.