Стратегот на Интер ја слави дерби победата, но предупредува: „Сега вниманието е кон Џеноа и Парма, тоа се 180 минути кои ќе покажат до каде сме“.
Насмеан и смирен. Таков беше Антонио Конте по синоќешната победа во миланското дерби. Како ретко кога имаше шанса со смиреност да зборува за еден натпревар бидејќи неговиот Интер со убедливи 3:0 го среди Милан.
„Дали ова е најубавата победа откако сум во Интер? Па, ајде ќе оставам најуабвата допрва да дојде... Сепак, вистината е дека беше прекрасен натпревар, да не заборавиме и дека ова беше дерби во кое влогот беше првото место. Притисокот беше голем, но момците беа одлични: напредокот продолжува, среќен сум бидејќи натпреварот го подготвивме перфектно. Морам да им упатам комплименти на Милан и на Пиоли, поради сѐ она што го прават таму. Овие три бода им ги посветувам на нашите навивачи биејчи празниот стадион беше морничав“, реше Конте на прес-конференцијата по натпреварот.
Победата во дербито е веќе во минатото, сезоната е долга, а сега пред лидерот Интер се два вистински теста против оние помалите екипи против кои не смее да си дозволи кикс. Потоа, пак, следува и незгодната Аталанта.
„Психички, стравувам од Џеноа и Парма: играчите го знаат тоа, ни следуваат 180 клучни минути. Не мислам сега на Аталанта, тие се силен тим, го знаеме тоа: фокусот ни е кон наредните две кои ќе ни кажат многу во однос на она кон кое целиме“, вели тој.
Одлична партија одиграа и двајца играчи кои беа критикувани од навивачите за слабите игри, но критики добиваше и Конте за тоа што не можеше да го извади на виделина нивниот несомнен квалитет.
„Задачата на секој тренер е на секој играч да му ги всади своите идеи. Што се однесува до Ериксен и Перишиќ, горд сум што тие, како и останатите, се подобруваат. Не секој веднаш прави импакт во новата средина, на Кристијан му беше потребно време. Не носам однапред заклучоци за никој, па така ни за Иван: тој не е играчот кој го запознав кога дојдов, оваа сезона е тотално ставен на располагање на тимот. Има неверојатен потенцијал, го покажа тоа сега“.
Ова е втора сезона за Конте во Интер и сѐ уште го чека првиот трофеј. „Нераѕурите“ се први во Калчото и итаат кон Скудетото кое 11 години го чекаат.
„Натпреварите ги подготвуваме врз база на карактеристиките на противникот: трудот се исплати, по година и пол заедно момците веќе убаво знаат да извлечат максимум од ситуациите. Ги освестивме сите со победите над големите екипи, последнава со Милан беше само последна потврда за тоа“, заврши Конте.