Легендарниот играч од средниот ред на Реал Мадрид, Гути Ернандес, зборуваше за кралскиот клуб во емисијата Linea Diletta што ја води италијанската новинарка Дилета Леота.
Тој истакна дека овој Реал е посилен отколку во ерата Галактикос и дека особено жали што не можел да игра со Шпанија на Светско или Европско првенство.
„Тоа е магијата на Реал Мадрид. Кога гледате натпревар на Реал, дури и кога тие губат, мислите дека ќе победат. Тоа е магијата на Реал Мадрид затоа што секогаш мислите дека можат да победат“, рече Гути, а потоа призна дека многу го боли што не игра на големо натпреварување за шпанската репрезентација.
„Има една работа која многу ме боли, а тоа е што не можев да играм на Светско или ЕП со Шпанија. Мислам дека не го заслужив тоа и дека требаше да играм“, додаде тој.
Гути се збогуваше од фудбалот во 2011 година како играч на Бешикташ, а се присети на еден од најдобрите потези во кариерата, асистенција на Карим Бензема против Депортиво со пета.
Реал Мадрид гостуваше во култниот Риазор, каде немаше победа повеќе од 18 години. Гранеро ги доведе Лос Бланкос во водство, а потоа Бензема на асистенција на Гути ја потврди победата за кралевите.
„Најдоброто е што Бензема ја следеше играта, можеше да застане и тогаш моето додавање немаше да има значење. Ќе беше полесно да шутирав, но тогаш никој немаше да се сеќава на тој гол“, објасни Гути и продолжи за сегашниот состав на „кралевите“.
„Овој Реал Мадрид е веројатно еден од најдобрите тимови што сум ги видел, тие се многу подобри од ерата Галактикос. Тогаш имаше многу ѕвезди, но сега ова е врвен тим, а ако дојде Килјан Мбапе ќе биде тим кој ќе означи една ера, не само во шпанскиот, туку и во европскиот фудбал“, додаде тој.
Овој 47-годишен играч за Реал играше 15 години, по што се пресели во Бешикташ каде се збогуваше од фудбалот, а на 14 настапи за Шпанија постигна три гола.
