Apple планира да претстави неколку нови уреди во 2024 година, според новинарот на Bloomberg, Марк Гурман.
Гурман вели дека компанијата од Купертино во март ќе претстави нова генерација таблети iPad Pro и iPad Air, од кои секоја ќе биде достапна во две големини.
Но, тоа не е сѐ, бидејќи Apple на пазарот носи и нови MacBook Air лаптопи со M3 процесор. Сепак, Mac Studio и Mac Pro ќе се приклучат на „М3 забавата“ подоцна, а според Гурман, тоа нема да се случи барем до крајот на 2024 година, односно можеби нема да пристигнат до 2025 година.
Со доаѓањето на новиот iPad, Apple планира да ги направи појасни разликите меѓу моделите за изборот да биде помалку збунувачки за клиентите. iPad Pro на Apple треба да добие нов M3 процесор, OLED екран и две опции кога станува збор за големината, односно 11 и 13 инчен модел. Исто така, се очекува нова Magic Keyboard наменета само за Pro моделот.
Новиот iPad Air ќе пристигне како 10,9, но и како модел од 12,9 инчи, а ќе го користи M2 процесорот. Промените треба да направат појасна разлика помеѓу iPad-ите од високата класа, од средната класа и стандардните, за клиентите полесно да одлучат што најмногу одговара на нивните потреби.
Што се однесува до MacBook Air со M3 процесор, Гурман тврди дека и тој најверојатно ќе пристигне во март во вообичаените големини од 13 и 15 инчи. Тогаш Apple би можел да го повлече својот M1 MacBook Air, кој пристигна во 2020 година.
Моделите од повисока класа, Mac Studio и Mac Pro, ќе бидат последни што ќе ја добијат надградбата на M3.
