Западот денеска ја осуди одлуката на проруските сепаратисти во окупираните украински региони неделава да започнат со одржување референдум за приклучување кон Русија.
Плановите на Москва за одржување „лажни референдуми“ во окупираните делови на Украина „се бесрамно кршење на меѓународното право“, изјави денеска генералниот секретар на НАТО, Јенс Столтенберг.
„Тоа е нова ескалација во војната на Путин“, додаде Норвежанецот и ја повика меѓународната заедница да го осуди потегот и да ја зголеми помошта за Украина. Лидерот на НАТО зборуваше во Њујорк, каде што учествува на Генералното собрание на Обединетите нации.
Белата куќа денеска го отфрли рускиот план за одржување на референдумот, велејќи дека Москва можеби ја донела одлуката за регрутирање војници во областите по големите загуби на бојното поле.
Во очигледно координиран потег, проруските власти најавија референдуми од 23 до 27 септември во регионите Луганск, Донецк, Керсон и Запорожје, кои сочинуваат околу 15 отсто од територијата на Украина и се со големина на Унгарија.
„САД никогаш нема да ги признаат руските претензии за украинските територии кои претходно ги анектираше“, изјави Џејк Саливан, советник за национална безбедност на претседателот Џо Бајден, според Reuters.
Германскиот канцелар Олаф Шолц изјави дека рускиот план за одржување „лажни референдуми“ во окупираните делови на Украина нема да биде прифатен, нагласувајќи и дека тоа е спротивно на меѓународното право.
Шолц на маргините на Генералното собрание на ОН рече дека Русија мора да ја повлече својата војска и дека „Украина има право да го брани интегритетот и суверенитетот на својата држава и демократија“.
„Ја поддржуваме Украина во тоа“, рече германскиот канцелар, а пренесе агенцијата dpa.
Францускиот претседател Емануел Макрон ги нарече референдумите нова провокација од Русија, велејќи дека идејата ќе беше смешна да не беше толку трагична.
Маркон целиот процес го нарече пародија и рече дека овие гласови нема да имаат правни последици и вети дека Франција ќе продолжи да му дава воена помош на Киев.