Најстарата ученичка во основно училиште, Кенијката Присила Ситиени, почина на 99-годишна возраст, објавија локалните медиуми, наведувајќи дека се запишала во селското училиште пред пет години.
Нејзиниот внук, Семи Чепсирор, за весникот Standard изјави дека Гого Присила, како што ја нарекувале, починала во средата во нејзиниот дом, по здравствени компликации.
„Гого беше во добра здравствена состојба и одеше на училиште до три дена пред смртта, кога имаше болки во градите и поради тоа го напушти училиштето“, изјавил внукот, додавајќи дека бабата била гордост за целото семејство.
Присила Ситиени имала 94 години кога успеала да го убеди директорот на училиштето да посетува настава.
Во интервју минатата година изјави дека целта ѝ е да ги мотивира младите мајки во Кенија да се вратат на училиште по раѓањето деца, наместо да се откажат од образование.
„Сакав да бидам пример не само за девојките од Кенија, туку и за другите девојки ширум светот кои не одат на училиште. Без образование, нема разлика меѓу вас и кокошката“, изјави тогаш старицата.
Нејзиниот живот беше тема на францускиот документарен филм „Gogo“, поради кој минатата година за прв пат полета со авион и во Париз ја запозна првата дама на Франција, Брижит Макрон.