Најследениот тиктокер, Хаби Ламе, кој воедно е и хафиз на Куранот, се присети на своите почетоци и како заработувал пари и испрати важна порака до своите следбеници.
Младиот комичар има вртоглави 142,8 милиони следбеници на популарната апликација, што го прави најследен профил на TikTok. Сепак, не беше отсекогаш така, а сега покажа како изгледале неговите почетоци.
Хаби на својот Twitter сподели видео од него како работи на градилиште и вози камион. Потоа се наоѓа пред огромен плакат за кампањата на модниот бренд Hugo Boss, со кој потпиша договор на почетокот на годината.
„Никогаш не престанувајте да напредувате и секогаш верувајте во своите соништа“, им порача тој на своите следбеници во објавата која веќе ја прегледале речиси 3 милиони луѓе.
Неговите следбеници ја преплавија објавата со коментари во кои споделија честитки и пофалби за Сенегалецот кој живее во Италија.
„Лудо е како животот може да се промени. Навивам за тебе“, му напиша еден корисник.
Инаку, Ламе почна да снима на TikTok откако ја загуби работата за време на пандемијата на коронавирус. Неговите неми видеа, но пропратени со впечатливи изрази на лицето, исмеваа бројни ситуации и со тоа станаа хит меѓу корисниците.
И покрај тоа што не кажа ниту еден збор, Хаби успешно најде заеднички јазик со своите следбеници, а тоа му отвори многу други врати.
Со брендот Hugo Boss потпиша договор во јануари и беше вклучен во кампањата #BeYourOwnBoss. Модниот гигант го опиша тиктокерот како „повеќе од само уште една ѕвезда на социјалните мрежи“.
Летово Хаби откри и дека не е само муслиман и некој што ја практикува религијата, туку и хафиз на Куранот.
Тој сè уште живее во Италија, каде што неговото семејство се преселило кога имал една година, а државјанството го доби дури неодамна.