Најскапиот фудбалер на светот, Нејмар, околу три месеци ќе закрепнува од скршеницата на десното стапало, изјави денеска докторот на бразилската репрезентација Родриго Ласмар.
Бразилецот играјќи за ПСЖ минатиот викенд, во дербито од француската Лига 1 против Марсеј се здоби со скршеница на прстот, односно го истегна зглобот на десната нога, поради што беше принуден да отпатува дома во Бразил.
Докторот Ласмар го прегледа и одлучи дека фудбалерот ќе мора да оди на операција, која ќе биде извршена во сабота.
„Должината на заздравувањето ќе зависи од тоа како ќе помине операцијата. Сепак, моментално проценуваме дека ќе трае меѓу два и пол и три месеци. Сметаме дека ќе има доволно време да се подготви за настап на Светското првенство“, изјави Ласмар.
Значи, Нејмар би можел да се врати во мај, па се претпоставува дека после овие зборови на докторот, Нејмар сепак, нема да биде во состојба да заигра оваа сезона повторно за ПСЖ.
За потсетување, Бразил првиот натпревар на Светското првенство во Русија ќе го игра на 17 јуни против Швајцарија.
Инаку, Нејмар до повредата, за ПСЖ оваа сезона постигна дури 28 погодоци и може да се пофали со 16 асистенции.
