Иако некои медиуми информираат дека Македонија вечерва игра во малтешката престолнина Ла Валета, тоа не е точно. Всушност, натпреварот не се ни игра во град, туку во место.
„Граунд Нацјонали Та' Али“ е стадионот каде вечерва Македонија игра многу важен натпревар, иако со далеку послаб противник. Она што е интересно и необично е што натпреварот не се игра во град, ниту во село, ниту пак во населено место.
Та' Али е всушност еден ненаселен отворен простор речиси на средината на најголемиот малтешки остров, кој се вика како и државата - Малта. Но, далеку од тоа дека е неискористен простор.
Ова место без жители содржи неколку малтешки структури. Покрај Националниот стадион, таму е и еден помал стадион наречен „Сентенари“, односно „Стогодишнина“ изграден по повод 100 години фудбал во Малта (1900-2000).
Малтешката фудбалска асоцијација (МФА), верувале или не, е една од најстарите во светот, формирана во далечната 1900 година. Нејзината база се наоѓа во подтрибинските простории на стадионот каде вечерва ќе игра Македонија.
Тука се наоѓа и Malta Fairs & Convention Center, градба која на Малтежаните им служи за одржување саеми, концерти, конвенции, гала настани, изложби, па дури и свадби. На 6 јуни годинава тука концерт одржа Селин Дион.
Потоа таму се и крафт селото Национален парк „Та' Али“, пазарот „Питкалија“, кој е најпознатиот малтешки зелен пазар, како и американската амбасада.
Со оглед на тоа што островот Малта е долг 27 км, а широк 14,5, во Та' Али брзо се стигнува од било каде. На пример, Та' Али од главниот град Ла Валета е оддалечен 12 км и се стигнува за дваесетина минути. Од холетот каде се сместени мскедонските фудбалери, „Вестин Драгонара“ во градот Сент Џулиан'с, има 13 км.
Иако на малтешки ова место се вика Ta' Qali, локалните жители велат дека буквата Q е безгласна, па затоа изговорот е Та' Али.
Што се однесува до самиот стадион, се работи за навистина прекрасно и средено здание. Собира само 16.997 гледачи, што е сосема доволно за полумилионската Малта.