Производителот на спортска опрема Nike вчера ги соопшти причините за раскинувањето на договорот со Нејмар, наведувајќи дека бразилскиот фудбалер одбил да соработува во внатрешната истрага за сексуално злоставување поднесено против него од вработена во оваа компанија.
Нејмар, кој во моментов игра за ПСЖ, ги негира ваквите обвинувања, а неговата портпаролка вели дека тој сигурно енергично ќе се бори доколку јавно биде изнесено какво било обвинение против него. Неговиот тим наведува дека ваквите обвинувања се неосновани и уште еднаш изјавија дека причината за раскинување на договорот со Nike е од комерцијални причини.
Овие изјави доаѓаат по текстот на Wall Street Journal за истрагата против Нејмар, а Nike претходно не се огласи за прашањето за раскинувањето на договорот со Нејмар.
Од компанијата за спортска облека и опрема посочија дека една вработена го пријавила инцидентот во 2018 година во внатрешна комуникација, и сè останало доверливо до 2019 година, кога сакала да поведе постапка поради настан што наводно се случил во 2016 година.
„Nike ги прекина врските со спортистот Нејмар затоа што тој одби да соработува во добронамерната истрага за тврдењата за незаконско постапување со вработените“, се вели во соопштението на Nike, а Wall Street Journal открива дека во времето на раскинувањето, Нејмар имал уште осум години од договорот.