Норвешка ја прекина планираната продажба на имотот на производителот на мотори Rolls-Royce во земјата на компанија под руска контрола.
Причината за тоа, како што се наведува, е проценка на безбедносните импликации на тој бизнис врз националната морнарица, соопшти денеска норвешкото Министерство за правда.
Норвешката агенција за безбедност (NSM) ја проценува продажбата на Bergen Engines во вредност од 150 милиони евра (178 милиони долари) на компанија контролирана од руската групација TMH, објави норвешкото министерство, пренесува Reuters.
Rolls-Royce ја соопшти продажбата на оваа фабрика на 4 февруари како дел од планот за деинвестиција, кој има за цел да му овозможи на британскиот производител на авиони и морски мотори да ја преживее кризата предизвикана од пандемијата со COVID-19.
Bergen Engines е, меѓу другото, и снабдувач на норвешката морнарица, која е членка на НАТО.
„Има значителни несигурности во однос на интересите на националната безбедност што треба да се решат“, рече на прес-конференција норвешката министерка за правда, Моника Меланд, додавајќи дека поради тоа е потребно да се одложи продажбата за некое време.
Таа исто така рече дека не знае каков ќе биде заклучокот од безбедносната проценка.
Сите тековни активности за претпазливост при продажба на компанијата исто така ќе бидат ставени во мирување сè додека трае процесот на проценка на безбедноста, се вели во соопштението на норвешкото министерство.
Портпарол на Rolls-Royce изјави дека компанијата навреме испратила соодветно предупредување до норвешката влада пред да ја објави продажбата на Bergen Engines.
„Сепак, разбираме дека норвешката влада сега сака дополнително да го испита овој договор и Rolls-Royce ќе соработува во таа ревизија на секој можен начин. Како што беше побарано, го прекинавме процесот на продажба“, рече портпаролот.
Руската групација TMH не одговори веднаш на барањето на Reuters за коментар.
Bergen Engines произведува бензински и дизел мотори со средна брзина за клиенти во бродската и енергетската индустрија и вработува околу 950 лица. Компанијата оствари приход од 239 милиони фунти во 2019 година, според податоците на Rolls-Royce.
Акциите на Rolls-Royce денес напладне паднаа за 0,9 проценти.
