Еден од најдобрите тенисери на сите времиња, Рафаел Надал, донесе уште една тешка одлука која навестува крај на неговата кариера, откако се повлече од турнирот во Монте Карло.
Следната недела се игра Мастерс турнирот во Монте Карло, а Надал три дена пред почетокот најави повлекување.
Шпанецот објави изјава која е болна за читање за љубителите на тенисот, велејќи дека телото едноставно не му дозволува да игра.
„Здраво на сите, ова се многу тешки времиња за мене, од спортски аспект. За жал, морам да ви кажам дека нема да играм во Монте Карло. Моето тело едноставно не ми дозволува. Дури и да работам напорно и да се трудам секој ден со сета волја да играм и повторно да се натпреварувам на турнирите кои ми беа многу важни, вистината е дека денес не можам да играм.
Немате поим колку ми е тешко да не можам да ги играм овие настани.
Единственото нешто што можам да направам е да ја прифатам ситуацијата и да се обидам да гледам во блиската иднина додека ја задржувам возбудата и волјата за игра за да им дадам шанса на работите да се подобрат.
Уште еднаш, ви благодарам на сите, како и секогаш, за поддршката и најдобри желби!“, стои во објавата на Надал.
Последниот натпреварувачки меч Надал го одигра во јануари годинава во Бризбејн, на кој му претходеше пауза од една година.
Шпанецот во јуни полни 37 години, а по ваквите најави јасно е дека незапирливо се ближи крајот на неговата играчка кариера.
