Македонската фудбалска легенда упати критика до министерот за надворешни работи Бујар Османи за делењето дипломатски пасоши на фудбалерите.
Во саботата Александар Трајковски, Енис Барди и селекторот Благоја Милевски добија дипломатски пасоши од Бујар Османи, кој потоа вети дека ќе им додели и на сите останати доколку забележат историски успех и се пласираат на Мундијалот во Катар.
Оваа политичка парада наиде на потсмев кај Горан Пандев, кој упати критика до Османи, велејќи дека за таков огромен успех на неговите поранешни соиграчи треба да им се изградат споменици, а не да им се делат пасоши.
„Смешен си господине, и жален. Гледај си политика и пушти ги хероите да уживаат, за нив треба споменици, а не пасоши“, напиша Пандев на сторито кои го објави на Instagram заедно со извадок од вест во која стои изјавата на Османи дека „ако ја победат Португалија цела екипа ќе добијат пасоши“.
Пред синоќешното полетување за Порто во авионот се качи премиерот Димитар Ковачевски, кој освен што им посака среќа и успех, соопшти и дека Владата ќе додели премија од 500.000 евра во случај репрезентацијата да избори пласман на Мундијалот.
Нормално, освен паричната премија репрезентативците ќе ги добијат и пасошите на Османи.
