Поранешниот стратег на Јувентус вели дека научил многу од авантурата во Торино, но и дека и натаму останува на ставот дека е подобро да се изгуби отколку да се помине натпреварот во 90-минутно бранење.
Андреа Пирло издржа само една сезона на клупата на „Старата дама“ откако претходно на големо изненадување го замени Маурицио Сари, иако далеку поискусниот стратег го освои Скудетото.
„Доколку не ја контролираш играта, тешко е да си мислиш дека ќе победиш. Се разбира, понекогаш има случаи кога имаш 90% посед и од единствениот удар твојот противник постигнува гол, но јас преферирам да изгубам така отколку целиот натпревар да го поминам во бранење на мојот шестнаесетник и обидувајќи се да постигнам гол на контри“, вели Пирло.
„Нема да ја променам тактиката само поради тоа што некои резултати не беа добри. Сѐ уште на истиот начин мислам за играта - да се игра од назад, да се задржува топката и колку е можно побрзо да се враќа поседот“.
„Многу зависи од тоа какви играчи имаш на располагање и што се тие кадарни да направат. Играчите се многу поважни од тренерите. Тренерите се тие кои треба да се адаптираат“, објаснува тој.
Минатата сезона не успеа да го одбрани Скудетото, а разочара и во Лигата на шампионите. Но, како за утеха успеа да ги крене пехарите од Суперкупот и од Копа Италија. И покрај тоа, управата се реши да се раздели со него.
„Научив многу. Тоа беше мое прво искуство како тренер, но беше многу напнато бидејќи сезоната ја почнавме со само еден пријателски натпревар. Сѐ се одвиваше многу брзо. Игравме на секои три дена, без навивачи, без да се одмориме и без да можеме убаво да тренираме и да се подготвиме за наредниот натпревар. Беше тешко да се пробуваат нови работи. Рехабилитацијата после натпревар е многу важна“, заврши италијанскиот стратег.
Пирло засега е без ангажман, а се шпекулира дека би можел да седне на клупата на некој клуб од американската МЛС.