Во американската сојузна држава Северна Дакота, на местото Танис, е пронајдена фосилизирана нога од диносаурус, на која е зачувана дури и кожата. Научниците тврдат дека диносаурусот кому му припаѓала оваа нога најверојатно загинал на денот на ударот на астероидот, кој на крајот го истребил овој вид.
Она што особено ги израдува научниците е што досега се пронајдени многу малку остатоци од диносауруси кои припаѓаат на периодот непосредно пред ударот на астероидот, пишува BBC.
Астероид кој удрил во Земјата пред 66 милиони години го означил крај на ерата диносаурусите и создал услови за цицачите да станат доминантен вид.
По должината на стапалото на диносаурусот најдена е фосилизирана риба која вдишувала остатоци додека паѓале од небото, желка прободена со дрвен кол, кожа на трицераптор, ембрион во јајце на птеросаурус и нешто што се чини дека е остаток од самиот астероид.
„Имаме толку многу детали кои ни кажуваат што се случувало од момент во момент, речиси како да гледате филм. Гледате во фосил овде и тоа ве враќа во тој ден“, коментира водачот на истражувањето, Роберт ДеПалма од Универзитетот во Манчестер.
Во науката е општо прифатено дека астероид со дијаметар од околу 12 километри удрил во областа на Мексиканскиот Залив и предизвикал изумирање на диносаурусите. Тоа е 3.000 километри оддалечено од локацијата во Танис, но силината на ударот била таква што уништувањето можело да го зафати и ова подрачје.
Професорот Пол Барет од Природонаучниот музеј во Лондон за BBC изјави дека тоа е Теселосаурус. Овој вид диносаурус изгледал како многу голем гуштер. Очигледно оваа нога на диносаурусот му била откорната многу брзо, според него нема докази за некаква болест на стапалото.
