Неколку лица се повредени во пукање во училиште во Финска утрово.
Осомничениот е уапсен во брза полициска акција во близина на училиштето, се наведува во соопштението за печатот на финската полиција. Се наведува дека напаѓачот е малолетник.
„Полицијата е на лице место и врши увид. Се замолуваат граѓаните да се држат подалеку од областа и во затворен простор. Вратите да не се отвораат за непознати лица“, се вели во полициското соопштение.
Очевидец, кој случајно се нашол во близина на училиштето на неговото работно место, го слушнал пукањето, за кое мислел дека е нешто друго.
„Не знаев дека е пукање. Потоа се слушна страшен крик и неколку деца истрчаа од дворот“, рече тој.
Случајниот минувач најпрвин не можел да ги поврзе детските врисоци што се слушале во училишниот двор со пукањето. Дури кога во дворот пристигнала вооружена полиција, сфатил дека нешто страшно се случува.
Тој наведува дека екипите биле многу брзо на теренот, 2 минути по пукањето.
Станува збор за училиште со повеќе од 800 ученици.
