Компанијата Razer го претстави најлесното компјутерско глувче за гејмери во својата историја.
Глувчето наречено Viper Mini Signature Edition тежи само 49 грама, што значи дека е 16 проценти полесно од моделот Viper V2 Pro.
Егзоскелетот на глувчето е направен од легура на магнезиум со полушуплива внатрешност и има мала сличност со глувчето SteelSeries Aerox 3 Wireless.
„Сакавме да го надминеме традиционалниот дизајн на саќе, а тоа бараше материјал со супериорен сооднос сила-тежина. По евалуацијата на пластиката, јаглеродните влакна и титаниумот, на крајот избравме легура на магнезиум поради нејзините одлични својства“, вели Чарли Болтон, шеф на одделот за индустриски дизајн во Razer.
Од компанијата велат дека глувчето ја користи нејзината најбрза безжична технологија и спаѓа во групата безжични глувчиња со најдобри перформанси.
Глувчето има оптички сензор Razer Focus Pro 30K, оптички прекинувач Gen-3 и технологија HyperPolling Wireless со polling rate од 4.000 Hz. Polling rate е брзината на комуникација помеѓу глувчето и компјутерот, односно колку често глувчето го известува компјутерот за својата позиција.
Батеријата на новото глувче трае до 60 часа, а потребни се помалку од 90 минути за целосно полнење преку USB-C портот.
Глувчето од 1 февруари се продава преку веб-страницата на Razer за 280 долари.
