По 3:1 поразот во мадридското дерби, од Реал Мадрид се пожалија на три судиски „грешки“ во текот на натпреварот, иако тренерот Карло Анчелоти изјави дека тој е одговорен.
Преку официјалната телевизија RMTV, клубот ги критикуваше одлуките на судијата Алберола Рохас во дербито, сметајќи дека направил три големи грешки – фаулот на Џуд Белингам пред првиот гол на Атлетико, остриот старт на Хосе Мариа Хименес кој не беше казнет со црвен картон, и играњето со рака на Марио Ермосо во шестнаесетникот.
„Тоа беше гол кој мораше да биде поништен. ВАР не ги разгледа снимките. Имаше јасен фаул во корист на Реал Мадрид. Засрамувачки е што тоа не беше досудено и без ВАР. Се работеше за одлучувачка игра, а ВАР судијата Гиљермо Куадра Фернандес требаше да го прекине мечот. Тој гол го постави риттамот на игра. Судењето на Алберола Рохас беше засрамувачко и го реши натпреварот. Реал Мадрид требаше да има 2:2 на полувреме, а Атлетико да биде со играч помалку“, се вели во коментарот.
Од друга страна, Анчелоти изјави дека резултатот е негова одговорност.
„Кога губите со 3:1 од градскиот ривал, тогаш е сосем нормално како тренер да преземете одговорност. Тоа е најмалку што можам да направам. За ова виновни не се играчите, туку е мој неуспех. Така треба да се гледа на ситуацијата“, е дел од изјавата на Анчелоти.
