Иако сите се надевавме дека пандемијата нема да трае толку долго, сè уште е нејасно кога ќе се вратиме на какво било ниво на старото нормално. Изолацијата и недостатокот на социјален контакт влијаат на сите, вклучително и на децата.
Затоа HuffPost одлучи да разговара со неколку експерти за влијанието на пандемијата врз децата, особено на малите деца на возраст од една до три години, од кои голем дел досега поминаа една третина од својот живот дружејќи се само со најблискиот круг на луѓе.
Досега се откриени бројни докази дека пандемијата им наштетила на менталното здравје и емоционалниот развој на многу деца. Така, некои истражувања покажуваат дека 60% од тинејџерите велат дека се осамени, а докажано е дека децата на возраст меѓу пет и 11 години сè повеќе имаат потреба да разговараат со експерти за ментално здравје.
„Загрижена сум дека пандемијата влијае на развојот на децата“, вели Обри Харгис, авторка на книгата „Toddler Discipline for Every Age and Stage: Effective Strategies to Tame Tantrums, Overcome Challenges, and Help Your Child Grow“
„Но, не сум загрижена за малите деца до три години“, додаде таа.
Малите деца треба да бидат во безбедна средина
Тоа е затоа што малите деца треба да бидат во пријатно, безбедно опкружување со луѓе кои се грижат за нив, вели Харгис. Ако тие потреби се задоволени, тогаш малите би требало да бидат добро.
Изолацијата и социјалната дистанца, на крајот на краиштата, не го ограничија многу светот на помалите деца.
„Сите работи што треба да ги развијат малите деца веројатно ќе бидат на свое место: играчки или други предмети за игра, некој мебел на кој можат да се качат, чорапи за да научат како да се облекуваат, сос од тестенини за да ги ангажираат своите сетила и возрасен или брат или сестра да разговараат да им се развијат рецептивните и експресивните јазични вештини“, смета Харгис.
Која е една од главните причини зошто експертите навистина не се загрижени за тоа како пандемијата може да им наштети на децата на една, две и три години? Малите деца се развиваат преку игра, но играта во оваа фаза не бара многу пријатели.
„На оваа возраст, децата главно се вклучени во паралелна игра, а не во заедничка игра“, објасни Харгис.
На оваа возраст нема потреба да се грижите за недостатокот на интеракција со врсници
Според нејзиното мислење, паралелната игра е нешто што и онака родителите го прават со своите деца сосема инстинктивно. Затоа, на оваа возраст не треба да се грижите за недостатокот на интеракција со врсници.
Ова е една од причините зошто студиите генерално не ја поддржуваат идејата дека програмите за предучилишна возраст имаат толку длабоки социјални, емоционални и образовни придобивки што експертите некогаш веруваа дека можат да ги имаат. Односно, од чисто развојна перспектива, тоа не е потребно за малите деца.
„Мислам дека родителите потценуваат колку можат да направат со децата во сопствениот дом“, вели Беки Кенеди, клинички психолог од Њујорк.
Родителскиот стрес и депресијата можат да го попречат развојот на детето
Децениски истражувања покажаа дека родителскиот стрес и депресијата можат да го попречат емоционалниот и однесувањето на детето. Значи, иако експертите во голема мерка не се загрижени дека малите деца пропуштаат големи развојни пресвртници за време на пандемија, тие се загрижени дека родителите ненамерно можат да пренесат стравови и грижи на своите мали деца. Како што рече Кенеди: „Малите деца навистина „ги забележуваат и согледуваат чувствата и стресот кај другите“.
Но, тоа не значи дека родителите треба да ги кријат своите борби и чувства од малите деца. Покрај тоа, тие треба да бидат поотворени за да можат децата да разберат што се случува. Игнорирањето на проблемите пред децата може да доведе до чувство на страв кај децата, самообвинување и сомневање во себе.
Исто така, важно е дека во отворените разговори со децата за COVID-19 и промените што пандемјата ги внесе во нивните животи, родителите да бидат смирени и со смирувачки тон да ги прашаат децата што знаат за тоа. И, ако тие не сакаат да зборуваат за тоа или всушност не им се допаѓа тој вид разговор, не ги присилувајте!