По патување од 7 месеци, роверот Perseverance успешно слета на површината на Марс. Мина 468 милиони километри за да слета на кратерот Језеро, од каде ги испрати и првите фотографии.
Роверот слета вчера во 21:56 часот на површината на Марс во кратерот Језеро, наречен според местото Језеро близу Јајце во Босна и Херцеговина. Ги испрати и првите фотографии од кратерот, а НАСА ги објави на Twitter со поздравот:
„Здраво, свету. Ова е мојот прв поглед на вечниот дом“, е наведено во објавата.
Потоа следи уште една објава во која роверот направил фотографија од тоа што се наоѓа зад него.
„Уште еден поглед на тоа што се наоѓа зад мене. Добре дојдовте на кратерот Језеро“, објави НАСА.
Агенцијата соопшти дека роверот е во одлична состојба по спуштањето на Црвената планета. Инженерите од контрола на мисијата одушевено ја поздравија потврдата дека е извршено слетување на возилото кое во наредните две години ќе трага по знаци на микробиолошки живот.
Се претпоставува дека пред неколку милијарди години на овој кратер постоело големо езеро и поради присуството на вода можеби постоел и живот.
„Успешно се паркиравме и имаме безбеден ровер на површината. Не можам да бидам погорд на мојот тим кој е заслужен за овој успех“, изјави Ален Чен кој го предводи истражувачкиот тим на НАСА.
