Рускиот фудбалски сојуз (РФС) денеска нема да донесе одлука за можно повлекување од УЕФА и преселба во Азиската фудбалска конфедерација (АФЦ), пренесуваат руските медиуми.
Иако за денеска беше закажан состанок на највисокото раководство на националната асоцијација, беше одлучено гласањето да се одложи, но, според медиумите, одлуката за оваа идеја ќе биде донесена до крајот на неделава.
„Одлучено е да се одложи гласањето за напуштање на УЕФА за да се добие малку време за дополнителни консултации. Планот е да се разговара за ова прашање во текот на оваа недела, односно до крајот на 2022 година“, порталот Чемпионат цитира извор од Рускиот фудбалски сојуз.
За потсетување, сите руски клубови и репрезентации се исфрлени од натпреварувањата под капата на УЕФА поради актуелната политичка ситуација со Украина, поради што постои идеја кај раководството на РФС да се насочат кон натпреварувањата во Азија.
Сепак, и да го сторат тоа, останува прашањето дали ФИФА ќе им дозволи да учествуваат во квалификациите за Мундијалот 2026.
