Фудбалерите на Шпанија го покажаа сиот свој квалитет и убедливо ја совладаа Грузија во осминафиналето на ЕУРО 2024 во Германија, но грузискиот селектор Вили Сањол беше критички настроен кон судиите во ВАР собата.
![](/sites/default/files/styles/article_image_xxl/public/2024-07/%D0%A1%D0%B0%D1%9A%D0%BE%D0%BB-%D1%81%D1%83%D0%B4%D0%B8%D1%98%D0%B0.jpg?itok=yxRAqRLs)
Францускиот стручњак и поранешен десен бек не оспори дека ривалот заслужено славел и дека во овој момент е подобар тим, но инсистираше на тоа дека судиите згрешиле кога му го признаа вториот гол на противникот.
„Сигурен сум дека беше во офсајд. На крајот на краиштата, имаше идентична ситуација на натпреварот помеѓу Холандија и Франција кога на Холанѓаните им беше поништен гол. Мората секако влијаеше на играта, но судиите го кажаа своето и тука е крајот на тоа. Мислам дека ВАР е многу корисен во модерниот фудбал, но проблемот е што не знаеме да го искористиме на вистински начин. Судиите се тие што ја гледаат секоја контроверзна ситуација на 10 различни телевизори и очигледно различно ја доживеале отколку ние“, изјави Сањол.
Контроверзниот гол на Родри кога Мората е во офсајд е на 1:55 на видеото:
„Цело време верувавме дека можеме да се справиме со Шпанија. Имавме наш план за игра, кој во голем дел од првото полувреме даваше резултат. Мислам дека натпреварот ќе се одвиваше поинаку доколку не беше признат тој втор гол на Шпанија, но нема врска. Играчите од ова треба да учат за да извлечат лекции, бидејќи се игра 90 минути и концентрацијата постојано мора да биде на високо ниво“, рече Сањол и додаде:
„Дојдовме до крајот на патувањето на ова Европско првенство, но сигурен сум дека ќе бидеме уште подобри на следното големо натпреварување“.
Грузија за прв пат во својата историја се квалификува на едно големо натпреварување и тоа преку баражот од Лигата на нации каде на пенали ја победи Грција. На завршницата се покажа во одлично светло освојувајќи 4 бода во групата, а шлагот беше кога во последното коло со 2:0 ја совлада Португалија, казнувајќи ја за експериментирањето со резервистите.