Член на Националниот олимписки комитет на Јапонија си го одзема животот скокајќи пред воз во движење во токиското метро.
Јасуши Морија, кој бил задолжен да го предводи сметководствениот сектор во јапонскиот олимписки комитет, утринава се фрлил пред воз во токиското метро. Не починал на лице место, веднаш бил пренесен во болница, каде сепак им подлегнал на повредите.
Полицијата покрена истрага, но првичните информации покажуваат дека се работи за самоубиство. 52-годишниот Морија бил идентификуван преку неговата лична карта.
Олимписките игри во Токио требаше да се одржат минатата година, но беа одложени за годинава и ќе се одржат од 23 јули до 8 август. Нема да бидат дозволени странски гледачи, а на стадионите ќе можат да влезат единствено жители на Јапонија и тоа во ограничен број.
Иако Олимпијадата ќе се одржи со такви строги мерки, сепак јапонскиот народ силно се противи на нејзино одржување и бара да биде одложена. Бројни испитувања на јавното мислење покажаа дека мнозинството Јапонци се или за целосно откажување на организацијата на нивната земја, или за одложување поради COVID-19.
