Шефот на Светската здравствена организација (СЗО) вчера ги поздрави напорите за зајакнување на меѓународното тело со седиште во Женева преку реформи, додавајќи дека се радува на тесна соработка со администрацијата на новоизбраниот американски претседател Џо Бајден.
Тедрос Аданом Гебрејесус одржа говор на годишниот министерски состанок на 194-те членки на СЗО во време кога бројот на случаи на новиот коронавирус во светот се приближи на 50 милиони, со 1,2 милиони смртни случаи од COVID-19.
„Ги поздравуваме сите напори за зајакнување на оваа организација, не за нас, туку за доброто на луѓето на кои им служиме“, рече шефот на СЗО.
Тедрос ја повика меѓународната заедница повторно да го открие значењето на заедничката цел и им честиташе на новоизбраниот американски претседател Xо Бајден и неговата заменичка Камала Харис.
„Се радуваме на тесната соработка со администрацијата на Бајден“, рече Тедрос.
Претседателот на САД, Доналд Трамп, го обвини СЗО дека е премногу наклонет кон Кина во врска со справувањето со пандемијата на COVID-19, обвинување што Тедрос постојано го негираше.
Трамп ги замрзна финансиите за СЗО и го започна процесот за напуштање на Организацијата, што треба да се случи следниот јуни. Бајден рече дека ќе ја укине одлуката на Трамп на неговиот прв ден на функцијата.
„Треба да го редефинираме лидерството и да го изградиме на заемна доверба и одговорност за справување со пандемијата и за справување со основните нееднаквости што се основа на многу од светските проблеми“, рече Бајден.
Од друга страна, Тедрос истакна дека вакцините против COVID-19 што се во фаза на развој, мора да бидат дистрибуирани праведно, како „глобално јавно добро, а не приватна стока“.
