Светската тенисерка број еден, Ига Швјонтек, како и американската тинејџерска ѕвезда Коко Гоф, беа запрени во осминафиналето на Австралија опен од две освојувачки на Грен слем титули, Казахстанката Јелена Рибакина и Латвијката Јелена Остапенко.
Актуелната победничка на Вимблдон, 23-годишната Јелена Рибакина, за 89 минути го победи светскиот рекет број еден Ига Швјонтек со 6-4, 6-4 и на тој начин првпат на Австралија опен стигна до четвртфиналето, а трет пат на Грен слем турнирите.
Нејзина противничка таму ќе биде 25-годишната Јелена Остапенко од Латвија, победничката на Ролан Гарос во 2017 година, која по тој сензационален триумф само двапати го мина осминафиналето на Грен слем турнирите, двата на Вимблдон (четвртфинале во 2017, полуфинале во 2018). Со 7-5, 6-3, Остапенко беше подобра од 18-годишната Американка Коко Гоф, минатогодишната финалистка на Ролан Гарос која ја започна сезоната со серија од 8 победи без загубен сет.
Рибакина и Остапенко ќе се борат за место во своето прво полуфинале на првиот Грен слем турнир во сезоната, а во четвртфиналето ќе им се придружи Американката Џесика Пегула. Третата носителка ја совлада Чехинката Барбора Крејчикова со 7-5, 6-2 и во четвртфиналето ќе игра против подобрата од поранешната двократна победничка на Австралија опен, Викторија Азаренка, и Жу Лин од Кина.
За Пегула ова е трето последователно четвртфинале на Австралија опен, а вкупно петто на Грен слем турнирите, каде Американката никогаш не ја прескокнала таа пречка.