Не престануваат проблемите на турнирот Австралија опен.
Австралиски тенисер со босански корени Бернард Томиќ пред два дена му се пожали на судијата за време на квалификациите за Австралија опен и тврдеше дека игра иако има коронавирус, бидејќи на турнирот не се прави PCR тестирање, а денеска се покажа дека бил во право.
На натпреварот против Руслан Сафиулин, по губењето на првиот сет, Томиќ му се обрати на судијата и му кажа дека е сигурен дека е заразен со коронавирус.
„Сигурен сум дека ќе добијам позитивен тест во следните три дена. Ако не, честам вечера“, му рече Томиќ.
„Не можам да верувам дека нема официјален PCR тест. Им дозволуваат на играчите да играат само врз основа на брз антиген тест што се прави во собата“, рече Томиќ.
Тој истакна и дека по мечот се чувствувал лошо, па доброволно заминал во изолација.
Се покажа дека постапил правилно бидејќи денеска добил позитивен PCR тест за корона.
