Кој работи, тој и греши. А, кога се работи за домашна работа, има простор за грешки. Особено за оние што се јавуваат како резултат на перењето алишта.
За среќа, можеме да поправиме некои од нив.
Ако некогаш ви се смалува облеката додека ја перете, тогаш знаете колку е досадно кога ќе сфатите дека вашата облека се намалила за неколку големини.
Сега веќе не е неопходно да се откажувате од омилените парчиња, сѐ што треба да направите е да земете шампон за бебиња и проблемот наскоро ќе биде решен.
Секако, потребна ви е и топла вода.
Значи, истурете топла вода во сад (погрижете се да не е ниту млака, ниту жешка) и малку шампон за бебиња (некои препорачуваат и омекнувач или регенератор за коса). Ставете ја облеката во оваа течност така што добро ќе се натопи, а потоа нежно исцедете ја и раширете ја на голем пешкир.
Следен чекор е да го свиткате пешкирот заедно со облеката, за да го впие вишокот вода. Потоа одвиткајте го, па раширете уште еден пешкир и преместете го парчето облека врз него. Внимателно со рацете истегнете ги и повлечете ги краевите на облеката, додека не се врати во првобитната големина. Откако целосно ќе се исуши, проверете го резултатот. Во случај да сакате дополнително да го проширите, повторете го процесот.
