Дуелот од осминафиналето на Лига Европа меѓу Лајпциг и Спартак Москва од УЕФА денеска ќе биде откажан поради војната во Украина, ексклузивно објави германскиот весник Bild.
Натпреварите требаше да се играат на 10 и 17 март, но ништо од тоа нема да се случи и наместо тоа Лајпциг без борба ќе се пласира во четвртфиналето.
Дополнително, Bild пренесува дека на Германците нема да им биде доделен нов противник преку дополнителна процедура.
„Сè уште сме во близок контакт со федерациите и имаме целосна доверба во УЕФА и нивната одлука. Претпоставуваме дека натпреварите ќе бидат откажани“, изјави првиот човек на Лајпциг, Оливер Минцлаф.
Во неделата ФИФА одлучи Русија и нивните клубови повеќе да не смеат да играат меѓународни натпревари на нивна територија, туку само на неутрален терен. Русите веројатно планирале домашниот натпревар да го играат во Ереван (Ерменија) или Баку (Азербејџан), но се чини дека нема да има ништо од тоа.
