Членови на јуниорскиот едриличарски клуб од Украина, кои останаа во Турција по почетокот на руско-украинскиот конфликт, се обидоа да го спречат впловувањето на луксузната јахта My Solaris во турското пристаниште Бодрум.
Јахтата му припаѓа на рускиот олигарх Роман Абрамович, истата тргна од Црна Гора кон Турција. Но, беше пречекана од украински едриличари кои се обидоа да ја запрат со мал гумен чамец, со знамето на Украина и транспарент на кој пишуваше „Не за војната“.
Сепак, нивниот план да го попречат патот на јахтата не успеа. My Solaris е долга 140 метри, а во Бодрум ќе остане една недела.
Ова е втората јахта која Абрамович ја донесе во Бодрум. Пред неколку дена, во ова турско пристаниште пристигна и Eclipse, една од најголемите јахти во светот, вредна 900 милиони долари.