Унгарија вчера го критикуваше Џорџ Клуни дека имал „ограничено“ познавање на нејзината историја и политика, откако американскиот актер го опиша десничарскиот премиер Виктор Орбан како „пример за омраза и гнев“ во светот.
„Го сакаме актерот Џорџ Клуни... но се чини дека неговото познавање од историја и политика е многу ограничено“, напиша унгарскиот министер за надворешни работи Петер Сијарто на Facebook.
Членовите на унгарската влада претходно го обвинија актерот дека е „марионета“ во рацете на милијардерот со унгарско потекло Џорџ Сорос, кого Виктор Орбан го обвинува за заговор против неговата влада преку невладина организација што ја финансира и за охрабрување на миграцијата.
„Сорос ја користи секоја можност да ја нападне унгарската влада. Фрустрирачки е што има актери кои ја водат битката со Сорос“, рече Орс Фаркас, владин портпарол.
Неколку медиуми склони кон Орбан објавија фотографија од Џорџ Клуни со синот на Сорос, Александар.
Одговарајќи на критиките од унгарската влада, Џорџ Клуни вчера за веб-страницата 24.hu рече дека „еднаш го запознал Џорџ Сорос на состанокот на Обединетите Нации за мигрантската криза на кој бил и американскиот претседател“.
„Го сретнав и неговиот син Алекс во Давос... така што пропагандната машина на Орбан лаже“, додаде Клуни.
