Пеналите се посебна уметност, но некои потези се понезаборавни од другите.
Овој пенал, најверојатно најбрзо изведениот во историјата на фудбалот, се случи во релативно непозната лига во светски рамки, но го доби вниманието на британски Guardian.
Спортското издание на весникот на својот Twitter профил објави видео од пеналот изведен од Томислав Мркоњиќ од Кроација Змијавци во ремито против Цибалија (1:1).
Гостите водеа со голот на Рене Шариќ сѐ до судиското надополнување, но потоа се случи контроверзен инцидент. Досуден беше пенал за домаќинот, а Томислав Балтиќ од Цибалија заработи црвен картон.
Томислав Мркоњиќ ја зеде топката, ја постави на белата точка и потоа долго време ги местеше чорапите. Кога судијата конечно даде сигнал за изведување на пеналот, Мркоњиќ одглуми залет и од место ја смести топката во голот. Ова ги изненади сите, вклучително и голманот Карло Слукиќ, кој не успеа ниту да се помрдне.
По натпреварот, Цибалија поднесе жалба на судењето, а Кроација решија да реагираат на обвинувањата за судиска помош со објавување пост на Facebook во кој ги наведоа сите грешки на нивна штета.
Guardian Sport објави видео од пеналот со опис „Дрзок пенал од еден чекор обезбеди реми во последните моменти од натпревар во хрватскиот фудбал“.
