Велика Британија воведе 65 нови санкции за руски компании и олигарси. Покрај Вагнер групата, платениците кои рускиот претседател Владимир Путин наводно ги ангажирал за да го убијат неговиот украински колега, Володимир Зеленски, меѓу нив е и државната компанија Руски железници, пренесе BBC.
Досега, Велика Британија воведе санкции против повеќе од 1.000 руски правни и приватни лица.
Меѓу новите компании, воведени се и санкции против Алфа Банк и Газпромбанк. На листата за санкции се најдоа и шефот на управниот одбор на Сбербанк и поќерката на рускиот министер за надворешни работи, Сергеј Лавров.
Според BBC, меѓу санкционираните е градоначалничката на украинскиот град Мелитопол, Галина Данилченко, која е поставена на позицијата од страна на Русија. Како што нагласува медиумот, според британската Влада, ова е првпат Велика Британија да санкционира лице за соработка со руските сили, a се наоѓа во Украина.
„Овие олигарси, компании и платеници се учесници во убиства на невини цивили и за тоа треба да платат. Путин не треба да има илузии, ние сме обединети со нашите сојузници и ќе продолжиме да ја стегаме руската економија за да го обезбедиме неговиот неуспех во Украина. Нема да попуштиме“, изјави Лис Трис, британската министерка за надворешни работи.
Британскиот премиер Борис Џонсон денес на самитот во Брисел изјави дека Велика Британија ќе воведе санкции за Вагнер групата.
„Мора да ја зголемиме нашата поддршка, мора да го стегнеме економскиот обрач околу Путин, мора да ги санкционираме овие луѓе. Да ја санкционираме Вагнер групата“, изјави тој.
Вагнер Групата е приватна милиција која, според пишувањето на Times, добила наредба од Владимир Путин да го убие Зеленски и 23 други функционери на украинската Влада, со цел Москва полесно да ја заземе контролата над Киев.
