Група археолози кои ги истражуваат древните остатоци во пристанишниот град Береника во Источен Египет, открија светилиште кое обезбедува докази за претходно непознати древни ритуални практики од доцниот римски период.
Во античкиот период овој град бил познат како Вереника Троглодитика, а бил основан во III век п.н.е. од македонскиот владетел Птоломеј II Филаделф кој го именувал во чест на неговата мајка Вереника, сопруга на родоначалникот на Птоломејската династија - Птоломеј I Сотер, еден од генералите на Александар Македонски. Второто име на градот, Троглодитика, потекнува од домородното население. Со векови служел како трговски центар што ги поврзувал источниот брег на Африка, Индија и Арабија и служел главно за транспорт на воени слонови. Последните ископувања извршени во внатрешноста на остатоците од верскиот комплекс покажуваат дека откритието е поврзано со присуството на Блемеи.
А кои се Блемиите? Тие биле номадски народ кој ја населувал Источната пустина во периодот од VII век п.н.е. до VIII век од н.е.. Во античките извори, тие прв пат се споменуваат во една од песните на Теокрит и од Ерастотен - кој наведува дека тие живеат во земјата помеѓу Нил и Црвеното Море. По најновите истражувања, било утврдено дека тие ја окупирале и контролирале Вереника некаде помеѓу IV и VI век, а храмот во верскиот комплекс - кој истражувачите го нарекле Сколово светилиште, бил преуреден и адаптиран за нивните потреби.
„Материјалните наоди пронајдени во храмот се исклучителни и вклучуваат понуди како харпуни, статуи во облик на коцка и стели кои укажуваат на религиозни активности што се случувале овде“, вели археологот Џоан Олер. До нив се откриени остатоци од околу 15 обезглавени соколи кои биле закопани заедно со јајца. Култот на соколот бил исклучително распространет во древниот Египет, но овој тип на погребување досега не е евидентиран на ниту еден археолошки локалитет.
Освен траги од непознати ритуални практики, научниците нашле и натпис на стелите: „Овде е забрането да се вари главата“. Се претпоставува дека зборовите служеле како предупредување со цел да се објасни дека вриењето животински глави е профан чин и е религиозно забранет.
Олер објаснува дека таа и нејзиниот тим по анализата заклучиле дека сите елементи укажуваат на ритуалните активности на Блемеите, кои, по освојувањето на Вереника, ги прилагодиле своите религиозни верувања на традиционалните египетски. Студијата е објавена во американскиот археолошки магазин American Journal of Archaeology.
