Пелистер и Вардар прикажаа одлична ракометна претстава на големото дерби во Битола кое на крајот заврши со поделба на бодовите.
Некаде до половината на првиот дел дуелот безе израмнет, а потоа на сцена стапи Борко Ристовски и со неколку одбрани допринесе за разлика. Гостите од Скопје беа подобри во остантиот дел и на пауза заминаа со 13:17.
За време на полувремето навивачите се одзваа на апелот на РК Еурофарм Пелистер и ја исполнија салата со плишани играчки кои ќе завршат како новогодишен подарок за децата од ранливите категории.
После паузата Пелистер често доаѓаше на -2 разлика, која Вардар успешно ја одржуваше. Кон крајот на натпреварот со исклучувањето на Стојанче Стоилов домашните прво намалија на гол разлика, за потоа на две минути пред крајот конечно да дојдат и до израмнување од 26:26.
Самиот финиш донесе уште два гола, двата од седум метри. Прво Стипе Мандалиниќ погоди за водство на битолчани, а потоа Тимур Дибиров израмни, исто така од пенал, за конечни 27:27.
Најефикасен на натпреварот беше вардарецот Анте Гаџа со 8 гола, 7 постигна домашниот Стипе Мандалиниќ, а по 6 Немања Обрадовиќ од редовите на битолчани и Жереми Тото од таборот на гостите од Скопје.
Со ваквиот развој на настаните нема промени на табелата каде Пелистер останува прв благодарение на подобрата гол-разлика. Двата тима имаат по 40 бодови (13 победи, 1 нерешена и 1 пораз), но битолачни со подобра гол-разлика.
