Стратегот на Реал е задоволен по првата победа во Лигата на шампионите и тоа не против било кој, туку главниот ривал Интер.
Откако во воведното коло Реал Мадрид киксна губејќи 2:3 дома од Шахтар, а потоа во Менхенгладбах бркаше негатива од 2:0 која на крај успеа да ја претвори во реми, синоќа одигра нов драматичен напревар, но победи со 3:2.
„Сакам прво да кажам дека нашата игра во Германија беше навистина добра. Ремито на тој натпревар беше праведно и вистина е дека и овој натпревар беше и тоа како израмнет, но сепак мислам дека ја заслуживме победата“, почна Зинедин Зидан.
„Добро одигравме. Постигнавме два гола и потоа отидовме на висок пресинг, како што и планиравме. Тесен натпревар во кој тие веднаш се вратија во игра кога дојдоа до 2:1. Второто полувреме за нас беше потешко, но тоа и се очекуваше бидејќи игравме против Интер. Беше навистина добар натпревар. Беше натпревар од кој моравме да ги освоиме трите бода и тоа и го направивме. Се радувам за играчите поради напорот кој го вложија, се боревме до крај и си ја заслуживме победата“.
Во новата сезона неговиот тим е мета на критики поради неубедливите резултати, но Зизу верува во тоа како неговиот тим се развива.
„Тимот има неверојатен карактер и лик. Играчите сакаат да докажат дека можат да играат добро. Сите знаеме дека надвор од теренот од време на време се случуваат разни работи. Ние ќе продолжиме да работиме како тим. Јасно ни е дека ќе ни биде тешко да работиме на високо ниво целата сезона бидејќи не постојат лесни натпревари“, смета тој.
Од Реал секогаш се бара да доминира и да победува, но францускиот стратег става јасно дознаење дека тоа нешто денес е практично невозможно.
„Јас не гледам некој друг тим да победува цело време и тоа со леснотија. Она што го знам е дека кога играме тимски тогаш е тешко некој да нѐ победи“.