Акционерите на Twitter го одобрија договорот за продажба на компанијата на бизнисменот Илон Маск вреден 44 милијарди долари.
Како што пренесува BBC, одлуката е донесена за време на кратка видеоконференција со инвеститорите во седиштето на компанијата во Сан Франциско.
Овој потег значи дека Twitter сега ќе се обиде преку суд да го принуди Маск да ја купи компанијата.
Всушност, Маск се обиде да го раскине купопродажниот договор, наведувајќи дека Twitter го довел во заблуда за големината на корисничката база, како и за бројот на ботови и спам профили.
Twitter ги отфрли ваквите обвинувања на Маск и го тужеше пред судот во Делавер. Маск потоа поднесе контра тужба.
Компанијата тврди дека Маск нема право да го раскине договорот.
Двете страни треба да се сретнат на суд во Делавер во октомври, а потоа судијата ќе одлучи дали Маск мора да ја купи компанијата или не, додаде британскиот јавен сервис.