Предводникот на Реал, Карло Анчелоти, изјави дека мадридскиот клуб сака да го елиминира Челси во четвртфиналето од Лигата на шампионите, пренесуваат шпанските медиуми.
Реал минатата сезона во финалето го победи Ливерпул со 1:0. Утре во Мадрид ќе го пречека Челси во првиот натпревар од четвртфиналето на најквалитетното европско клупско натпреварување. Овие два клуба играа и минатата сезона во четвртфиналето на ова натпреварување. На првиот дуел во Лондон, Реал победи со 3:1, а Челси со идентичен резултат го доби реваншот.
Потоа се играа продолженија, а Реал се пласираше во полуфиналето бидејќи на крајот беше 3:2 за Челси, или вкупни 5:4 за Реал.
„Заслуживме да славиме минатата година. Имавме повеќе енергија на крајот од натпреварот. На крајот заслуживме да ја освоиме Лигата на шампионите, а ќе се обидеме да ја заслужиме и оваа година“, рече Анечелоти на прес-конференцијата во Мадрид.
Италијанскиот стручњак истакна дека Реал го почитува Челси.
„Минатата сезона имавме многу лоши моменти во Мадрид и јасно е дека мораме да го почитуваме Челси. Точно е дека овој клуб не минува низ добар момент, но има многу добар тим. Понекогаш кога оди полошо, го вадиш најдоброто“, истакна Анчелоти.
Натпреварот помеѓу Реал и Челси се игра во среда од 21 часот во Мадрид, а реваншот е закажан за 18-ти овој месец во Лондон.
Анчелоти е и поранешен тренер на Челси откако ги водеше „Сините“ од јуни 2009 до мај 2011 година.
