Лука Модриќ сѐ уште не се договорил за продолжување на договорот со Реал Мадрид, но тренерот на шпанскиот великан Карло Анчелоти даде голем комплимент за статусот на хрватскиот играч за врска.
Капитенот на хрватската репрезентација пред неколку месеци го продолжи договорот на една година и потоа се согласи на 10 отсто помали примања, објави шпански AS. Модриќ во септември го прослави својот 36-ти роденден, а актуелниот договор му истекува на крајот на јуни, што значи дека веќе може да преговара со други клубови.
Но, како што стојат работите, тој речиси сигурно ќе остане во Реал. За тоа пишуваше и AS, а зборовите на Анчелоти само ги потврдуваат наводите на шпанскиот весник.
„Лука Модриќ сè уште нема потпишано продолжување, но практично има доживотен договор со Реал Мадрид“, рече Анчелоти, цитиран од познатиот новинар Фабрицио Романо, кој исто така рече дека е само прашање на време кога Модриќ ќе го продолжи договорот до јуни 2023 година.
