Карим Бензема (35), напаѓач на Реал Мадрид и најдобар фудбалер во светот, повеќе нема да игра за француската репрезентација, потврди денеска на социјалните мрежи.
Откако го пропушти Мундијалот поради повреда и бројните шпекулации дека е во расправија со селекторот Дидје Дешан, одличниот голгетер реши токму на роденденот да стави крај на репрезентативната кариера.
Официјално најдобриот светски фудбалер беше принуден да го пропушти Мундијалот поради проблеми со повреди, а потоа се шпекулираше дека селекторот на Франција, Дидие Дешан одбил да го вклучи напаѓачот на Реал во нокаут фазата на Мундијалот во Катар.
Првичната дијагноза укажуваше дека тој ќе биде надвор од терените три недели, но Бензема се опорави по само 10 дена и беше подготвен да се приклучи на националниот тим.
Дешан беше прашан од новинарите пред финалето дали ќе го донесе Бензема, а тој рече: „Ух, подобро да не одговорам на тоа. Следно прашање“.
Бензема објави своја фотографија на Instagram и напиша: „Не ме интересира“.
Француските медиуми веднаш објавија како Бензема на овој начин му рекол на Дешан дека не сака да биде дел од неговиот тим, додека шпанскиот портал Libertad отиде чекор понатаму, тврдејќи дека Бензема не си заминал доброволно од Катар, туку дека бил „избркан“ и дека е многу лут поради тоа.
На крајот од сагата, Бензема објави дека ја завршил својата репрезентативна кариера и повеќе нема да игра за Франција.
„Вложив труд и направив грешки кои требаше да ги направам за да бидам таму каде што сум денес и горд сум на тоа! Ја напишав мојата приказна, а нашата завршува“, напиша Бензема на социјалните мрежи.
Бензема за Франција одигра 97 натпревари и постигна 37 гола. Секако, ќе остане запаметено дека тој не играше за триколорите шест години, пред да се врати во 2021 година.
Во 2015 година Бензема беше исфрлен од француската репрезентација поради скандал во кој соиграчот Матје Валбуена го обвини дека го уценувал со порно снимки, а напаѓачот на Реал Мадрид секогаш ги негираше овие наводи.