Возачот на Мерцедес, Британецот Луис Хамилтон, на крајот од сезоната ќе се пресели во тимот на Ферари во Формула 1 шампионатот, пренесува шпанскиот спортски весник AS.
Шпанскиот весник истакнува дека добиле потврда дека Хамилтон ќе вози за Мерцедес до крајот на оваа сезона, а потоа ќе потпише договор со Ферари.
„Блиску сме до потпишувањето на деценијата во Ф1. Хамилтон е на прагот да се пресели во Ферари. Конечниот договор треба да биде финализиран наскоро, но седумкратниот светски шампион сака да освои уште една титула со црвениот болид пред да ја заврши кариерата во Ф1“, пишува Хесус Бласеиро, новинар на AS, повикувајќи се на одредени италијански медиуми.
Британецот ќе го замени Шпанецот Карлос Саинс во тимот на Ферари, а во италијанскиот тим треба да вози заедно со Шарл Леклер, кој во тој тим ќе биде до 2029 година.
Хамилтон има договор со Мерцедес до крајот на 2025 година. Сепак, шпанскиот весник тврди дека британскиот возач има излезна клаузула во договорот што му овозможува да го прекине партнерството со Мерцедес.
Во 2007 година Финецот Кими Раиконен ја освои последната титула за Ферари во Ф1 во конкуренција на возачи, а италијанскиот тим триумфираше 16 пати во конкуренција на конструктори, последен пат во 2008 година.
Хамилтон (39) освои 7 титули во Ф1 во кариерата, а последната во 2020 година.
Новата сезона во Ф1 шампионатот започнува на 2 март со трката за Големата награда на Бахреин, ќе се одржат вкупно 24 трки, а последната е планирана за 8 декември во Абу Даби (ОАЕ).
