Тренерот на Барселона состави список на играчи кои сака да ги избрка.
По крајот на сезоната во која Барселона го освои само Купот на кралот, тренерот Роналд Куман се пожали дека нема доволно квалитетни играчи на располагање.
„Кога го презедов тимот, не можев да го составам како што сакав. Единственото засилување што ми беше дозволено да го донесам беше Сержињо Дест, а тој дојде дури на последниот ден од преодниот рок. Тимот што го имам не е на ниво на Барселона. Тоа не е тајна и многумина во клубот го мислат истото“, рече Куман.
Иако шпанските медиуми веќе го отпишаа и шпекулираат кој ќе биде негов, Куман е убеден дека ќе ја води Барселона и следната сезона. Мадридски AS открива дека холандскиот тренер составил список на играчи на кои не смета.
Миралем Пјанич, Филипе Кутињо, Матеус Фернандеш, Жуниор Фирпо, Нету Мурара, Мартин Брејтвејт и Самуел Умтити се играчи кои Куман сака да ги продаде ова лето, а Франсиску Тринкау и Рики Пуиг одат на позајмица.
Сержи Роберто, Клемент Ленгке и Усман Дембеле се исто така на трансфер листата и тие ќе си заминат доколку дојде доволно добра понуда.
Барселона се договори за доаѓањето на Серхио Агуеро од Манчестер Сити како слободен агент, а Џорџињо Вајналдум од Ливерпул можно е да пристигне без обештетување.
