Фудбалерите на Швајцарија синоќа до 88. минута имаа пласман на ЕУРО, но поради голот на Израелецот Шон Вајсман ќе мора да ги чекаат последните два натпревара за да го заверат пласманот.
Првата меч топка Швајцарците ќе ја имаат веќе на следниот натпревар в сабота, а тој дуел ќе биде особено емотивен за најголемите ѕвезди Гранит Џака и Џердан Шаќири.
Имено, Џака и Шаќири ќе се најдат во крајно незавидна ситуација со оглед на тоа што ќе играат против „своето“ Косово, со кое Швајцарија се бори за пласман на Европското првенство.
Поточно, со победа во Базел, Швајцарците ќе се пласираат на ЕУРО, а дури и со реми Косоварите ќе останат без шанса за пласман на собирот на најдобрите европски репрезентации.
Откако со 1:0 го совлада Израел во неделата, на Косово сега му требаат две победи на последните два натпревара за да испише историја. Но, потребно е не само да ја победи Швајцарија в сабота, туку потоа Швајцарците и да загубат на гости кај Романија во последното коло. На тој начин Косово и Швајцарија би имале ист број на бодови, по 16, но Косово би бил подобар во меѓусебните дуели со оглед на тоа што првиот натпревар заврши 2:2. (Во УЕФА натпреварувањата при ист број на бодови одлучува меѓусебен дуел, додека во ФИФА натпреварувањата клучна е гол-разликата.)
Да потсетиме, родителите на Џака се од Косово, додека Шаќири е и роден во Косово.
Покрај нив двајца, во редовите на Швајцарија има уште двајца играчи чии родители се Косовари, Анди Зеќири и Уран Бислими. Вториот лани дури и двапати играше за Косово и постигнаа еден гол.