Џенаро Гатузо ги дочека своите пет минути како тренер откако на Наполи му ја донесе шестата титула во Копа Италија совјадувајќи го Јувентус во финалето.
„Тренирам екипа составена од вистински мажи и шампиони. Овој успех го заслуживме бидејќи работевме напорно не оставајќи ништо на случајноста. Му благодарам на Де Лаурентис што ми даде шанса да ја тренирам оваа група“, рече Гатузо по финалето.
Прв трофеј за потценетиот тренер Гатузо. Кога лани го замени искусниот Карло Анчелоти на клупата на тимот од градот под Везув, мнозинството велеа дека тоа е голем чекор назад за Наполи бидејќи Гатузо едноставно не е достоен да предводи голем клуб.
Синоќа популарниот Рино ги замолкна сите. Играта која ја постави тотално го спречи Јувентус да создаде сериозни шанси, Наполи имаше повеќе шанси за гол и лесно можеше да победи и во регуларните 90 минути.
„Животот ми даде многу повеќе отколку што направив јас. Фудбалот ме направи човек, а јас многу малку дадов за возврат. Смртта на мојата сестра беше тежок период, никогаш нема да ја преболам“, почнува Џенаро кој неодамна ја загуби својата 37-годишна сестра.
„Секој што ја врши оваа професија мора да има почит: поради тоа многу пати сум лут, го правев тоа многу години. Од моите играчи барам да покажат дека се дел од тимот, како и почит. Мора да се работи сериозно, а потоа секогаш има по некој фудбалски Бог доколку работиш добро“, истакна тој.
Со триумфот во купот Наполи ја оствари зацртаната цел за оваа сезона. Но, како што стојат работите, тимот ќе извиси за Лигата на шампиони за наредната сезона. На табелата е на 6. место со дури 9 помалку од Аталанта која е четврта. Гатузо ветува дека ќе се обидат да го направат невозможното и повторно да се пласираат во Лигата на шампиони.
„Соништата се многу важен дел од животот: наша должност е преостанатите 12 натпревари да ги одиграме со почит. Имаме многу фудбалери, секој ќе има шанса, имаме должност да се обидеме“, вели тој.
Наполи сезонава сѐ уште не испаднал од најеминентното европско клупско натпреварување. Во август го чека реванш со моќната Барселона на гости, а првиот дуел во Неапол заврши 1:1.