Стратегот на Наполи е претпазлив во пресрет на вечерашното финале во кои се надева дека ќе му донесе трофеј на тимот од градот под Везув.
Денеска со почеток во 21 часот се игра финалето од Копа Италија помеѓу Наполи и Јувентус. Пред празните трибини на „Олимпико“ во Рим и под будното око на судијата Даниеле Довери, Наполи ќе се обиде да дојде до шестиот трофеј, а прв под водство на Гатузо.
„Не е баш најдобар момент за да се соочиме со Јуве. Победувањето е впишано во нивната ДНК. Мораме да бидеме навистина одлични, да ги респектираме и паметно да ги искористиме нашите предности бидејќи тие располагаат со голем менталитет и многу маестрални играчи. Навистина ќе биде тешко“, вели Џенаро Гатузо во изјава за Raisport.
За поранешниот фудбалер ова е прва голема шанса да освои трофеј од клупата. Но, за да го направи тоа ќе мора да го надмудри Маурицио Сари, стратег од кој Гатузо всушност многу копирал.
„Мене Сари многу ми се допаѓа, никогаш не сум негирал дека од него сум копирал начин на игра. Ми се допаѓа како ја држи одбранбената линија, тој беше меѓу првите во Серија А кој го вметна дриблањето позади. Многу ми се допаѓа. Од таквите одлични тренери секогаш може многу да се научи“, вели популарниот Рино.
Наполи чека на трофеј од 2014 година кога триумфираше во купот и во Суперкупот. Оттогаш нема стигнато ниту до финале и жителите на градот се желни за радост.
„Овие денови луѓето од Неапол беа многу блиски до мене и до мојата фамилија, низ градот испишуваа многу убави пораки па ние мораме да им пружиме голема радост. Мора да дадеме сѐ од себе за нас и за целиот град“, заврши тој.
