HTC, до неодамна еден од најголемите произведувачи на смартфони со оперативен систем Android, се наоѓа на раб од пропаст.
Имено, тајванската компанија влезе во огромни финансиски проблеми, па сега најавуваат дека ќе отпуштат 25 отсто од работната сила, или околу 1.500 работници, со цел да го подобрат профитот кој константно опаѓа.
Тајванскиот произведувач на смартфони своевремено беше помеѓу десетте најголеми, но во последните неколку години едноставно ја загуби битката со конкурентите – Samsung, LG, а што е уште позначајно за нив, ја загубија и битката со кинеските ривали кои го преземаат се поголемиот пазар.
„Мораме да го оптимизираме производството во Тајван, па сме присилени на ваков потег. На тој начин ќе ги распределиме ресурсите и ќе им овозможиме на управата да се концентрира во понатамошните чекори“, изјавија од HTC.
Отпуштањето на работната сила би требало да се спроведе до крајот на септември, а ова е продолжение на големите проблеми во тајванската компанија.
Шпекулациите околу отпуштање на работници почнаа кон крајот на минатата година, кога околу 2.000 инженери на HTC беа префрлени во компанијата на Google, Alphabet, а тајванската компанија на тоа заработи 1,1 милијарди долари.
Меѓутоа, остана без вредни делови и дизајн, кој сега Google го продава со ознака „Powered by HTC“.
Отказите се всушност логичен расплет на настаните, после константниот пад на продажбата и профитот. Во однос на минатата година, сега приходот на HTC забележа пад за 55,5 отсто, а продажбата за 46,7 отсто.
HTC, кога Android како платформа штотуку се развиваше, го доживеа својот врв. Нивниот модел HTC Desire беше еден од најпопуларните телефони на оваа платформа.
Меѓутоа, од година во година компанијата забележува големи падови, а сега како што стојат работите, се чини и дека се близу до банкрот.