Дури и на точните Швајцарци може да им се случи да задоцнат. Нормално, не секогаш по нивна вина, но сепак им се случува.
Тоа синоќа беше случај на фудбалскиот натпревар помеѓу Швајцарија и Литванија кој требаше да започне во 20:45 часот, истото време во кое играше и Македонија и ред други натпревари. Но, дуелот во Швајцарија никако не почнуваше.
Пред почетокот на натпреварот во Сент Гален, официјалните лица на УЕФА при проверка на теренот забележаа аномалија кај едниот од головите. Откако на око им делувал некако поголем, го измериле, по што навистина излегол повисок отколку што треба да биде. Наместо 2 метра и 44 сантиметри, голот бил цели 10 сантиметри повисок по што веднаш побарале да биде променет.
На прецизните Швајцарци им беа потребни петнаесетина минути да го тргнат голот и да донесат друг, по што натпреварот конечно почна околу 21 часот.
За овој превид дефинитивно ќе лета некоја оставка бидејќи во Швајцарија сѐ мора да фукционира како часовник.
Ако ништо друго, нивната репрезентација славеше победа од 1:0 благодарение на голот на Џердан Шаќири постигнат уште во 2. минута, што секако е премалку со оглед на очекувањата за полна гостинска мрежа.