Бројни истражувања потврдија дека сонцето е главен предуслов за создавање на витамин Д во организмот, а речиси половина од светската популација има премалку од овој витамин.
Се препорачува 5 до 30 минути изложување на сонце за да се задоволат дневните потреби за витамин Д.
Мајк Ројзен, доктор од клиниката „Кливленд“, ја објаснува важноста на витаминот Д, особено за зајакнување на имунитетот. Недостатокот на витамин Д или неговото ниско ниво е забележлив кај постарите луѓе и хронично болните пациенти.
„Студиите покажаа поврзаност помеѓу ниската концентрација на витамин Д и инфекциите на респираторниот систем, но и пневмонијата, хепатитисот Б и Ц и ХИВ“, рече тој.
Докторката Александра Луис рече дека витаминот Д е неопходен за многу различни физиолошки процеси.
„Витаминот Д влијае на коските, го спречува воспалението, го подобрува спиењето и го подобрува функционирањето на срцето и мозокот. Неговата препорачана дневна доза за возрасен е помеѓу 600 и 800 IU дневно, а телото не може да ја добие таа количина само преку храната“, објасни таа.
Покрај рибата, за да се внесува витамин Д преку храната потребно е да се консумираат:
- млеко богато со витамин Д;
- житарици кои се збогатени со овој витамин;
- печурките се извор на витамин Д.
Д-р Луис препорачува да се провери количината на витамин Д во крвта, а потоа врз основа на резултатите лекарите ќе препорачаат додаток.
„Без разлика на времето кое го поминуваме на сонце, треба да се консумира храна богата со витамин Д. Доколку сѐ уште го имате премалку во крвта, тогаш треба да земете додаток на витамин Д“, вели таа.
Советувајќи како да се внесе повеќе витамин Д, Американското здружение за срце и кардиоваскуларни болести наведе дека витаминот Д е најзастапен во лососот, туната и скушата.
